Rossiya Davlat Dumasi mamlakat tashqarisida yashirinib, jazoni ijro etishdan bo‘yin tovlayotgan shaxslar uchun vaqtinchalik cheklov choralarini nazarda tutuvchi qonunlarni ikkinchi va uchinchi o‘qishda bir ovozdan qabul qildi.
Cheklovlar jinoyat sodir etgani uchun hukm qilingan va xorijda yashirinayotgan fuqarolar uchun nazarda tutilgan. Ular Rossiya davlati xavfsizligiga qarshi ma’muriy huquqbuzarlik sodir etishda aybdor deb topilgan shaxslarga ham tatbiq etiladi.
Jami 14 ta vaqtinchalik chora nazarda tutilgan. Ular orasida Rossiyadagi ko‘chmas mulkka bo‘lgan huquqlarni ro‘yxatdan o‘tkazishni to‘xtatish, pul va boshqa mol-mulkni muzlatish hamda bloklash, shuningdek transport vositalarini boshqarish huquqini cheklash bor.
Ro‘yxatga davlat va munitsipal xizmatlarni elektron shaklda ko‘rsatishni rad etish hamda yakka tartibdagi tadbirkor sifatida davlat ro‘yxatidan o‘tishni taqiqlash ham kiradi. Ma’muriy asoslar qatorida, xususan, Rossiyaning hududiy yaxlitligini buzishga yoki unga qarshi sanksiyalar joriy etishga chaqiriqlar, Qurolli kuchlarni obro‘sizlantirish va xorijiy agentlar haqidagi qonunchilikni buzish ko‘rsatilgan.
O‘zgartirishlarning qabul qilinishi jazoning muqarrarligi tamoyilini va qonun ustuvorligini ta’minlash uchun qo‘shimcha sharoitlar yaratish imkonini beradi — Vyacheslav Volodin, Davlat Dumasi raisi.
Normalar qonun rasman e’lon qilingan paytdan kuchga kiradi. Shu sababli cheklovlar allaqachon amal qilayotgani haqidagi ifoda muddatidan oldin bo‘ladi.
